نصائح هامة


صفحة تحتوي على نصايح عامة في كل مجالات الحياة والويب والبرمجة يمكن أن تفيدك في حياتك أو عملك وجميع هذه النصائح موجودة في ال Facebook تحت هاش تاج باسم #نصائح_الزيرو

نصيحة بخصوص التسرع في التعليم

التقدم ببطأ في الاتجاه الصحيح خير من التقدم بسرعة في الاتجاه الخاطيء ناس كتير من اللي بتتعلم وهو في وسط الدراسة وبيتعلم برمجة العاب مثلا ولسه بيتعلم المباديء عاوز برمج لعبة كبيرة جدا ويدخل يشوف كل حاجة في اللعبة بتتعمل ازاي ويرجع يتعلمها لوحدها من غير ميعرف الاساسيات اوعى تفتكر ان انت كدة صح انت بكل بساطة عامل زي الي فاتح محل صيانة الكترونيات اول ميجيله جهاز عاوز يصلحه يدخل يشوف الجهاز دة بيتصلح ازاي ويتعلم ويصلحه مستحيل خبرتك تيجي لخبرة واحد اتعلم الصيانة كاملة بكل مبادئها وعرف عنها كل حاجة وبدا يشتغل دة مش محتاج يدور اي جهاز هيجيله هيعرف يتعامل معاه. السرعة مش كويسة في التعليم وهتوقع منك حاجات كتير هتحتاجها اوعى تفتكر لما تبدا حياتك بانك تعمل مشروع من غير متتعلم المباديء والاساسيات انك هتنجح كل اللي حصل انك هتعمل المشروع لكن في حاجات بسيطة جدا ومباديء هتقع منك ودايما هتلاقي نفسك بتعتمد على الانترنت علشان تشتغل مش هتعمل حاجة من دماغك ابدا. اتعلم المباديء والأساسيات علشان تنجح ولو بتمل منها ممكن وانت بتتعلمها تطبق معاها تمارين عليها علشان متملش منها


نصيحة بخصوص وقت التعلم

نصيحة اليوم ابعد عن 3 حاجات لو عاوز تتعلم وتحترف ( عك ربك يفك / مشي حالك / انا يومين اتعلم وافوت في الحديد )
حصل مواقف كتير في حياتي مع ناس تدل ان النوعية اللي ماشية على الامثلة اللي فوق دي موجودة كتير جدا ولو انت زيهم عمرك مهتتعلم وتوصل واخرك هتشتغل في حاجات تحت السلم كلها لكن لو عاوز تشتغل في مكان محترم ومرموق وحياتك تتغير للأحسن لازم يكون فيك شيء مميز وتكون Unique عن باقي الناس في مجالك.
موقف طريف حصل من نوعية الناس دي جالنا واحد في الشركة كنا عاملين اعلان عاوزين Linux Admin ودعم فني مع التيم بتاعنا جالنا واحد مصري ابن بلدي ربنا يباركله وقعد مع المدير والمدير بدا يختبره قاله ايه مدى خبرتك ومعرفتك بنظام Linux قاله معرفوش بس اديني ال Manual ويومين وابقى أحسن من الناس اللي عندك دة أكبر مثال على الناس اللي ماشية بمبدأ عك ربك يفك متفهمش دي ثقة في النفس ولا تخلف ولا هبل ولا ايه سبحان الله المهم نستفيد من الموضوع ان المدير مش بس اتخنق من الشخص وكرهه ؟ لا دة بقى مش بيعمل انترفيو مع اي حد مصري تاني علشان خد انطباع وحش عن انهم ماشين كلهم كدة لحد ما الحمد لله أقنعته ان دي نوعية قليلة وان المصريين الحمد لله محترفين وفي ناس منهم جامدين جدا جدا بفضل الله. الدروس المستفادة من القصة انك متعملش فيها ابو العريف واديني المانوال وسيبني انا افوت في الحديد اتعلم صح علشان تحترف.
برضة حصل موقف ان ناس تسال كتير قدامي عن لغة بايثون مثلا ويروح واحد يرد عليها ويضحك ضحكة مستفزة هههههههههه ويقولها هي بايثون محتاجة حاجة علشان تتعلميها ؟ والبنت المسكينة طلع عينيها ومش عارفة تتعلمها وتراسلني تقولي هو انا غبية للدرجة دي ؟ العيب مش عليها العيب على اللي ورالها ان اللغة هايفة واحبطها الموقف دة حصل في صفحة المبرمجين المصريين مع واحد الله يصلح حاله هناك من يوما خد بلوك وسبت الصفحة بطلت ادخلها تماما.
الموقف دة بعدها اصبح بيتكرر كل يوم وانت بتتعلم تلاقي واحد يفتيلك ويقولك اللغة دي مش محتاجة غير ساعة علشان تتعلمها وتلاقي كورس تعلم الجافا سكريبت في 30 دقيقة دة كدة مش تعليم دة واحد بيحكيلك عن واحد صاحبه :D والتعليم دة مش هيخليك تشتغل غير في محل كشري عاوز تحترف وتتعلم صح ادي لكل حاجة حقها علشان هي كمان تديلك حقك كل لغة مهما كانت هايفة من وجهة نظرك فيها حاجات كتير متقدمة لو عرفت هتكون تميزت عن باقي الناس في مجالك والشركات العالمية بتدور على الانسان المميز روح شوف واحدة زي سارة سويدان قضت حياتها كله متخصصة بس في ال SVG واحنا لسه عندنا ناس بتقولك لغة ايه مش عاوزة غير ساعة او يوم واللي يقولك اتعلمت PHP كاملة باحتراف في خمس أيام لا تعليق امشي في طريقك ومتحبطش من الناس دي ومتقولش على نفسك غبي هما اللي فاكرين انهم Super Humans وهما معلوماتهم أصلا اقل من معلوماتك انت شخصيا


نصيحة بخصوص الخوف من التجربة

ايام Windows 95 وقبله كنت حافظ السيريال الخاص بيه من كتر معملتله Install ومعاه برنامج ACDSee ومعاه Picaview واكتر من 15 برنامج تاني كل البرامج دي سيريالاتها كانت بتترواح بين 10 إلى 25 رقم وحرف بفضل الله ونعمته كنت حافظهم عادي جدا اصحابي كانوا بيتجننوا وازاي مستحيل ومش مقتنعين لكن انا كنت عارف انهم غلط هما يقدروا يحفظوهم بسهولة لكن هما مجربوش وخايفين اول مقولتله يبني سهلة جدا جرب وهتلاقيك حفظته وفعلا حفظوا البرامج وال Windows وعليهم برامج زيادة كمان :D ايه النصيحة ؟ في ناس كتير بتخاف تتعلم لغات برمجة او اي تقنية او حاجة في شغله خايف علشان مجربش اقنع نفسه انه مش هيعرف لانها صعبة او لاي سبب تاني لكن اول ميدخل يتعلم بيلاقيها سهلة وبيتحرف كمان ممكن يدخل كورس يتعلم منه ويلاقي نفسه بقى احسن من اللي بيشرح الموضوع كله في التجربة جرب ومتخافش جرب تتعلم لو معرفتش اللغة مش هتموتك :) جرب تكتب كود لو منفعش مش هينفجر في وشك :) جرب تقرى مقال تقني لو مفهمتوش مش هتموت :) Everything is Easy if You Try it


نصيحة بخصوص عمل الخير

اعمل الخير دايما ومتبصش للمقابل اكتر من شخص سألني ليه بتضيع وقتك وتشرح وليه بتعمل فيديوهات وليه بترفض مشاريع جايالك بفلوس وتزود دخلك والاجابة كانت صدمة بالنسبة ليه ان ربنا رزقني بحاجات اكتر من اللي كنت بحلم بيها بكتير اعمل الخير دايما ومتبصش للمقابل لانك هتاخده هتاخده بس الفرق انك هتاخده اكتر بكتير لانه من عند ربنا تخيل لو عملت لعميل موقع واتفق معاك على 1k USD وبعد مخلصت ادالك 1.1k طبعا هتفرح جدا علشان جالك رزق زيادة مش متوقعه لكن ربنا اللي خلقنا جميعا رزقه ميتحسبش ولا يمكن تتوقعه ولا تتخيله ابسط حاجة ان ربنا رزقني بتيم كبير ناس بتساعد في نشر القناة وناس بتساعد في ترجمة القناة والدروس وتصميم الصور وعاوزين يعملوا اي خير. دول مين بعتهم او مين قالهم او بيعملوا كدة ليه ؟ علشان الخير بيقابله دايما الخير والله يوفقنا واياكم.


نصيحة بخصوص ال Facebook والعمل والمذاكرة

ال Facebook زي ما عليه ناس مطورين وناس بتاعة شغل وبس عليه ناس صاحية من النوم علشان تعمل Chat لحد ما اليوم يخلص ويقوموا يناموا وخلص يومهم على كدة. ورحت انت في الرجلين عاوز تنتج وتعمل شغل صح وتعمل اللي عليك وتتعلم اقفل صفحة ال Facebook من المتصفح وخلص شغلك كاملا وهترجع تلاقيه مش هيختفي وهترجع تلاقي نفس الناس وهتلاقيهم بيعملوا برضة Chat :) اطمن مش هيطيروا والله يوفقكم جميعا.


نصيحة بخصوص الملل من المذاكرة والعمل

ناس كتير بتقول ان بيجيلها احباط في وسط المذاكرة أو يكون بيصمم موقع ويجيله ملل مش عاوز يكمل أو يكون في وسط البرمجة وكله سليم ومفيش ايرور ولا حاجة وبيقوم ميكملش ويتضايق من غير سبب ولما نساله يقول انه بيحب المجال دة حقيقي اللي بيحصل دة طبيعي وبيجي لناس كتير وانا بشرح ساعات بيجيلي ملل اني مش عاوز اشرح ومخنوق ومش عاوز افتح اي حاجة اشرحها رغم عندي اكتر من فكرة في الحالة دي لازم تغير مودك لازم تعمل حاجة انت بتحبها تاني غير دي علشان ميكونش في رتابة في حياتك بالنسبة لي مثلا بقوم العب اي لعبة نص ساعة كدة او اتفرج على فيلم وفي وسط الفيلم بفضل افكر في حلمي فكر في حلمك دي النصيحة فكر عاوز توصل لايه وعاوز تعمل ايه هتلاقي نفسك زي مبيحصلي في ربع الفيلم او نصه اقوم اشرح واكمل تاني حط لنفسك حافز دايما قدام عينيك وانت بتعمل اي حاجة واحد بتحبه ونفسك توصله, حلم عاوز توصله, موقع عاوز تعمله, اي حاجة في الدنيا المهم لما تشوفها تخليك تقتل الملل والرتابة. انزل اتمشى شوية بعيد عن الكمبيوتر اعمل اي حاجة بتحبها وارجع تاني كمل حلمك هتلاقي الملل راح من عندك صدقني. يارب العملية تنجح معاكوا


نصيحة بخصوص التعليم والتوظيف

مجال الويب أو أي مجال تعليمي او بتشتغل فيه عامل زي ال Games أي لعبة بتلعبها بيبدأ في اللعبة بانه يعلمك ال Tutorials وازاى تتحكم في الازرار والحركات وال Skills بتستخدمها ازاى بعد كدة بيسيبك تلعب. نفس القصة في الويب بتتعلم من الكورسات اللغة وازاى تشتغل بيها بعد كدة لازم تبدأ انت تبرمج وتصمم علشان توصل محدش هيعلمك الاحتراف الكورسات بتعلمك تقف على طريق الاحتراف بعد كدة لازم تمشي بنفسك الكورس مش هيمشيك ابدا. نفس القصة زي السباق ممكن حد يديلك عربية Ferrari سريعة جدا لكن مستحيل يدوسلك على البنزين ويمشيك لازم انت تمشي علشان تكسب السبق الخلاصة بعد متتعلم لازم تطبق والا كان كل شخص اتعلم اشتغل تاني يوم.