إنت محتاج تدرس وتتأسس أولا

بلعب لعبة اسمها Wo Long: Fallen Dynasty اللعبة دي بتفكرني بالبرمجة وحل المشكلات

أول ما تلعب اللعبة وتروح لأول وحش وتتعذب علشان تموته هتقول زي ما ناس كتير قالت في التعليقات على فيديوهات الوحش دة على يوتيوب ان اللي عاملين اللعبة ومخليين اول وحش بالصعوبة دي مرضى نفسيين وبعد ما تعديه وتكمل في اللعبة هتلاقي كمية تحديات رهيبة وهتلاقي كل شخصية عادية في اللعبة تحدي وممكن في أي لحظة يموتك. بغض النظر عن ان اللعبة دي من سلسلة العاب ال Souls اللي بيقولوا عليها Prepare to Die Games لأن الألعاب دي بتموت فيها كتير جدا هتبدأ بقى تفهم حاجة مهمة ان الموضوع مش موضوع انك ماسك حربة او عصاية او سيف وماشي تضرب وخلاص أي هبل وانت ماشي لأ اللعبة محتاجة دراسة. آه زي ما سمعت كدة دراسة. بتدرس الشخصية والاسلحة وحركات الوحوش وكل وحش نقطة ضعفه ايه وبتعمل عشرات التجارب مع الوحش وبتموت مرة واتنين وعشرة لحد ما تفهم تتعامل معاه ازاي وأهم شيء ال Elements ومين بينفع مع مين والسلاح اللي معاك ماشي مع ال Element دة ولالا وكل الكلام دة دراسة بمعنى الكلمة. المهم بقى بعد ما تدرس الدنيا هتبقى عاملة ازاي هتلاقي ان الموضوع بقى سهل وانك تقدر تخلص اللعبة اللي كنت بتقول عليها معقدة وصعبة واللي عاملها مريض نفسي.

في وحش في اللعبة لو انت Level مليون مش هتعرف تموته بالدراع والبلطجة مستحيل لازم تكون دارس تتعامل معاه ازاي وتستنى كل ضربة وتتعامل معاها بالطريقة المناسبة علشان تقدر تتفوق عليه خليك فاكر الكلام دة.

تعالى بقى نطبق الكلام دة على البرمجة في ناس واخدة البرمجة بالدراع ماسك عصاية وداخل يخبط وبس وبالتالي بيشوف كل حاجة صعبة وأبسط حاجة في المجال هتكون تحدي ليه لأنه متأسسش كويس ولا فهم كل حاجة بتستخدم إزاي وامتى علشان يقدر يستخدمها في الوقت السليم والمكان السليم والدنيا تبقى سهلة وزي ما حكيتلك في اللعبة هتلاقي نفسك بتحل مشاكل وتحديات بطريقة سهلة وهتستمتع ومش هتحس ان حاجة معقدة جدا او مستحيلة أو على الأقل مش هتحس انك مخنوق من الموضوع لا هتلاقيه صعب بس تقدر تعمله بشوية تجارب وافكار وتستخدم اللي اتعلمته ودة اللي حصل بالظبط في اللعبة.

الألعاب ومواقفنا في الحياه مرتبطة كل حاجة بتقابلها هتلاقي في حاجة شبهها بس في مجال تاني كل اللي عليك تتأسس صح وتتعلم فايدة كل حاجة ومتاخدش حاجة بالدراع علشان مش هينفع في حاجات لازم تدرسها صح ولو أخدتها بالدراع والبلطجة مش هتدخل دماغك وهتقف عندها بقية حياتك لانها محتاجة دراسة صح وإستخدام لأدواتك صح وبس