تخيل إنك اتعلمت برمجة وعملت مشاريع وحليت مشاكل وقعدت بالساعات تدور وتجرب لحد ما وصلت لحلول وبعد كل ده تفتح إعلان وظيفة وتقول لنفسك أنا أقدم إزاي؟ أكيد فيه ناس أحسن مني بكتير وكمان أنا أصلا بدور على حاجات كتير ومش بكتب كل حاجة من دماغي ولو اتقبلت واكتشفوا إن مستوايا مش زي ما هم متخيلين ؟
الإحساس ده بيتوصف أحيانا باسم متلازمة المحتال أو Impostor Syndrome
إنك تقلل من قدراتك وإنجازاتك وتحس إن نجاحك جه بالحظ أو بمساعدة الناس وإن في أي لحظة حد هيكتشف إنك مش بالكفاءة اللي شايفينك بيها والاسم هنا بيوصف تجربة ومشاعر ممكن تمر بيها مش تشخيص طبي في حد ذاته
في البرمجة الإحساس ده ممكن يظهر إزاي ؟
1- تخلص مشروع شغال كويس وبدل ما تشوف إنك اتعلمت ونفذت
تقول ده مشروع بسيط أي حد يعمله
2- تحل مشكلة كانت معطلاك يومين وبدل ما تقدر مجهودك تقول
ما أنا لقيت الحل بعد ما دورت يبقى مش شاطر
3- حد يشكر في شغلك فتقول
هو بس مشافش الناس الجامدة بجد
وفي كل مرة تلاقي تفسير يقلل من دورك في النتيجة
طبعا إنك تنقل كود مش فاهمه مختلف عن إنك تبحث عن حل وتفهمه وتجربه وتعرف تستخدمه في المكان المناسب لكن مجرد إنك احتجت تبحث مش دليل إنك مش مبرمج كويس جزء من الشغل إنك تعرف توصل للمعلومة وتقيمها وتطبقها وتتحقق إن الحل مناسب وعلى فكرة أنا قعدت سنين ولسة مكمل بنصح الناس بالبحث أصلا
ولما تيجي تقدم على وظيفة؟
تلاقي وظيفة Junior Front-End Developer طالبة HTML و CSS و JavaScript و Git ومعرفة ب React مثلا إنت اشتغلت بالتقنيات الأساسية وعندك مشاريع تقدر تشرحها لكن خبرتك في React لسه محدودة بدل ما تقرأ الإعلان وتشوف مستوى المعرفة المطلوب وهل React شرط أساسي ولا ميزة إضافية تقفل الصفحة وتقول أنا لسه مش جاهز وبعدها تقرر تاخد كورس جديد قبل التقديم وتخلص الكورس فتكتشف أداة تانية مش عارفها فتأجل تاني وهكذا تتحول جملة "لازم أطور نفسي" لسبب مستمر لتأجيل الخطوة اللي إنت بتتعلم علشانها أصلا التعلم مهم لكن محتاج يكون عندك تصور واضح لمعنى الجاهزية يعني لو مستني اليوم اللي تعرف فيه كل حاجة ومتعرفش فيه الخوف ممكن تفضل مستني كتير أو غالبا للأبد
طيب إزاي تفرق بين نقص المهارة والشك في نفسك؟
نقص المهارة تقدر تسميه وتحدد له خطوة مثلا "أنا لسه مش فاهم التعامل مع الـ APIs كويس ومحتاج أطبقه في مشروع" أما التقليل من نفسك فغالبا بيبقى حكم عام يعني انك تقول مثلا "أنا مش نافع في البرمجة وكل اللي عملته ملوش قيمة" الجملة الأولى فيها مشكلة محددة تقدر تشتغل عليها الجملة التانية بتمسح مجهودك كله من غير تقييم عادل ولا تقييم محمود حتى :D آسف وممكن يبقى عندك الاتنين مع بعض مهارات محتاج تحسنها وقدرات موجودة بالفعل إنت مش مديها حقها
اعمل تقييم بالأدلة
بدل ما تسأل نفسك أنا شاطر ولا لأ ؟ اسأل أسئلة أوضح
- هل أقدر أبني مشروع مناسب لمستوى الوظيفة ؟
- هل فاهم الكود اللي كتبته وأقدر أشرح قراراتي ؟
- هل أقدر أتتبع مشكلة وأجرب حلول وأختبر النتيجة ؟
- إيه المتطلبات الأساسية اللي عندي وإيه اللي لسه ناقصني ؟
الإجابات دي هتساعدك تعرف مكانك بشكل أدق من مقارنة نفسك بشخص عنده خبرة عشر سنين واكتب الحاجات اللي أنجزتها المشاريع اللي خلصتها والمشاكل اللي حليتها والملاحظات اللي إتحسن شغلك بسببها ووقت الشك في نفسك هتحتاج تفتكر وقائع مش مجرد كلام تحفيزي
قدم بصدق وسيب مساحة للتقييم
لو عندك أساس مناسب للوظيفة وفيه متطلبات ناقصة شوف أهميتها وحجم الفجوة
مش كل بند ناقص يمنعك من التقديم
وفي نفس الوقت فيه شروط أساسية مينفعش تتجاهلها
وضح مستواك الحقيقي في الـ CV والمقابلة
تقدر تقول إنك استخدمت تقنية في مشروع شخصي ولسه مشتغلتش بيها في بيئة عمل وتقدر تقول إنك متعرفش إجابة سؤال معين وتشرح إزاي هتدور عليها إنت مش مطالب تدعي المعرفة علشان تثبت إنك تستحق فرصة ولو اترفضت استفيد من الملاحظات لو متاحة وصدقني يا صديقي الرفض لوحده مش تقييم شامل لقيمتك أو لمستقبلك في المجال وممكن تكون فيه فجوة فعلية محتاجة شغل أو ببساطة توافق أقل مع احتياج الوظيفة يعني من الآخر خلي قرارك بالتقديم مبني على متطلبات الوظيفة وأدلة مستواك متخليش جملة "أصل أكيد فيه ناس أحسن مني" تضيعك وتخليك تترفض قبل ما تبعت ال CV أصلا