عمرك سالت نفسك ليه بعض الالعاب اول ما تبدا تحط قدامك Boss قوي جدا يموتك وانت لسه مش فاهم حاجة ؟
ممكن تفتكر ان الهدف هو تعويدك على ان الموت والفشل جزء طبيعي من اللعبة وده فعلا ممكن يكون سبب لكن فيه اهداف تانية مهمة.
اللعبة بتخليك تحس بضعفك في بداية الرحلة وبتوريك خطورة العالم اللي انت داخله بدل ما تكتفي بكلام الشخصيات عنه وبتديك مقياس لتطورك علشان لما ترجع لنفس ال Boss وتهزمه تفتكر ان ده هو نفسه اللي مكنتش عارف تقف قدامه ثواني وتحس بقيمة كل حاجة اتعلمتها وممكن تكون بتعلمك من اول لحظة ان الاندفاع والضرب العشوائي مش كفاية وانك محتاج تراقب وتفهم وتصبر وتختار الوقت المناسب واحيانا الهزيمة نفسها بتكون جزء من القصة وسبب في بداية رحلتك.
الفكرة مش دايما انك تتقبل الخسارة وخلاص الفكرة انك تفهم ان عدم قدرتك على تجاوز حاجة في البداية مش معناه انك عمرك ما هتقدر تتجاوزها ممكن تكون بس لسه محتاج تتعلم شوية وترجع تحاول تاني.
فيه نقطة مهمة وهي ان تكرار المحاولة لوحده مش معناه انك بتتعلم
ممكن تواجه نفس ال Boss عشرين مرة وتخسر بنفس الطريقة لانك بتكرر نفس الغلطة في كل مرة
لكن لما تلاحظ سبب خسارتك وتغير توقيت حركتك او طريقة هجومك كل محاولة بتضيفلك حاجة حتى لو لسه مكسبتش
وساعات اللي بيتطور مش الشخصية اللي جوه اللعبة ولا السلاح اللي في ايدها
انت نفسك بتتطور وبتبقى اهدى وبتفهم اللي قدامك اكتر وبتاخد قرارات احسن
وده معنى يستحق ناخده معانا برا الالعاب
متقيسش تقدمك بس بعدد المرات اللي كسبت فيها
قيسه كمان بالاخطاء اللي فهمتها وبطلت تكررها
إنسى الألعاب وطبق كلامي دة في الحقيقة
في التحديات اللي بتتعامل معاها