بعض الناس أول ما بتشوفك منزل نصيحة أو جملة فيها فايدة بيشتغل عندها ال Sensor بتاع التنمية البشرية وبتبدأ تتعامل مع الكلام بسخرية أو هجوم قبل ما تفكر فيه أصلا لو قابلت حد بالشكل ده متضايقش منه ومتستعجلش في الحكم عليه ممكن يكون اتعرض قبل كده لكلام كتير مليان وعود ومبالغات ومسمعش منه غير إن النجاح سهل وإن كل مشاكله هتتحل لو غير طريقة تفكيره أو صدق في نفسه وأنا شخصيا اتضايقت من النوع ده من الكلام زمان وفاهم ليه ممكن يخلي الناس تتحسس من أي نصيحة شبهه.
ساعات البوست بتاعك بيفكر الشخص بتجربة سيئة أو بحد باع له الوهم فبيكون رد فعله على اللي افتكره أكتر من الكلام اللي إنت كتبته وده ممكن يفسر الهجوم لكنه مش معناه إن الهجوم صح وعلى الناحية التانية لو إنت من الناس اللي بتتحسس من أي كلام رايح ناحية التنمية البشرية فأحب أقولك إن المسمى نفسه مش هو المشكلة إن الإنسان يتعلم ويطور نفسه ويفهم أخطاءه ويحسن تعامله مع حياته دي حاجات كويسة لكن المشكلة في اللي استغل المعاني دي علشان يبيع وعود من غير أساس أو يقنع الناس إن جملة حماسية كفاية تغير واقعهم من غير تعلم ولا شغل ولا مراعاة لظروفهم لكن مش معنى إن فيه ناس باعت الوهم تحت اسم التنمية البشرية إن كل نصيحة بقت وهم وكل كلام عن التطور بقى نصب وفي نفس الوقت مش كل كلام مريح أو جميل يبقى صح
المطلوب إنك تبص للفكرة نفسها
هل الكلام منطقي وهل مناسب لظروفك وهل فيه حاجة تقدر تطبقها وتستفيد منها
ولا مجرد وعود كبيرة من غير خطوات واضحة
فيه نصايح بسيطة ممكن توفر عليك وقت أو تنبهك لغلطة
أو تساعدك تشوف موقف من زاوية مختلفة
ومش لازم النصيحة تغير حياتك بالكامل علشان يبقى ليها قيمة
ومش لازم تكون مناسبة ليك علشان تكون مفيدة لغيرك
بغض النظر بقى عن اسمها تنمية بشرية أو بتنجانية حتى المهم محتواها وإنت هتعمل بيه إيه يعني لو هتفيدك خدها واشكر اللي قالهالك وادعيله ولو مش مناسبة ليك تجاهلها وكمل يومك ولو فيها معلومة غلط أو وعد مضلل انتقد الفكرة ووضح المشكلة من غير ما تحول الموضوع لخناقة مع صاحبها متخليش اللي ضحك عليك زمان ياخد منك فرصة إنك تستفيد من حد صادق النهارده احكم على الفكرة بمعناها مش بالمسمى اللي اتحط عليها وبس :)