كتابة بوست على السوشيال ميديا ممكن تاخد منك دقايق لكن أحيانا الدقايق دي بتفتح باب ياخد منك ساعات وانت مش واخد بالك يعني تنشر فكرتك وتدخل تكمل يومك فتلاقي تعليق مستفز تقول هرد عليه رد صغير وبس يرد عليك فتوضح قصدك ويدخل شخص تالت فهم الكلام غلط فتشرح من الأول وفجأة تكتشف إنك قضيت 4 ساعات وممكن أكتر بتحاول تثبت لناس متعرفهاش إنك مش الشخص اللي هما قرروا إنك تكونه. البوست خلص من بدري لكن المعركة اللي دخلت نفسك فيها لسه مخلصتش والغريب إنك ممكن تقوم بعدها تقول أنا مش لاقي وقت أتعلم أو أقرأ أو أقعد مع أهلي مع إن الوقت كان موجود لكنه اتصرف في مكان تاني.
متابعة التعليقات والجدال اللي مش بيوصل لحاجة ممكن تاخد منك من ساعة لأربع ساعات وساعات أكتر بكتير والبحث عن عيوب الناس ممكن ياخد يومك كله لأنك كل ما تخلص من شخص هتلاقي غيره ومتابعة حاجات ملهاش أي قيمة عندك ممكن تملأ كل فراغ في يومك من غير ما تضيفلك حاجة أما محاولة تغيير كل الناس أو تربيتهم قبل ما تبدأ بنفسك فدي ممكن تاخد العمر كله.
المشكلة إن الوقت اللي بيضيع مش بيعمل صوت مش بيخبط على كتفك ويقولك خلي بالك أنا جزء من عمرك ومش هتستردني تاني هو بيمشي بهدوء واحنا بنقول خمس دقايق كمان علشان كده خليني أقولك إيه اللي ممكن يتعمل في 4 ساعات فقط مش لازم تعمل كل ده ولا دي أرقام ثابتة لكل الناس لكنها أمثلة من حياتي على قيمة نفس الوقت اللي ممكن يضيع في جدال واحد
- ممكن تشوف 24 فيديو تعليمي لو متوسط الفيديو عشر دقايق وده ممكن يكون محتوى دورة كاملة مع مراعاة إن الفهم والتطبيق محتاجين وقت كمان
- ممكن تقرأ عشر مقالات تتعلم منهم حاجة جديدة أو تلاقي فيهم حل لمشكلة معطلاك
- بالنسبة لي ممكن أسجل من 4 لـ 8 فيديوهات تعليمية حسب طولها وتحضيرها
- ممكن أكتب مقال أو مقالين وأحول فكرة في دماغي لحاجة غيري يستفيد منها
- ممكن أرد على 50 رسالة من ناس محتاجة مساعدة حسب طبيعة الأسئلة
- ممكن تقرأ جزء كبير من كتاب أو تخلص رواية قصيرة حسب حجمها وسرعة قراءتك
- ممكن تفهم موضوع بيحصل في العالم بدل ما تكتفي بعنوان وتدخل تتخانق عليه
- ممكن تمارس هواية بتحبها وتفصل شوية عن ضغط يومك
- ممكن تقعد مع أسرتك وتسمعهم بتركيز من غير ما عينك تكون على الموبايل
- ممكن تتعلم مهارة أو تطبق مشروع صغير يزود خبرتك وفرصك في الشغل
وممكن ترتاح لأن قيمة الوقت مش معناها إنك تحول كل دقيقة لشغل وإنجاز يعني ساعة راحة محتاجها أو قعدة حلوة مع أهلك ليهم قيمة حتى لو مفيش حاجة تتحط بعدها في قائمة إنجازاتك الفكرة إنك تكون إنت اللي اخترت تقضي وقتك في إيه وتكون فاهم المقابل اللي أخدته. فيه فرق بين إنك تقفل الموبايل وانت مرتاح وبين إنك تقفله وانت مستنزف ومتعصب ومش فاكر حتى كنت بتجادل على إيه ومش كل نقاش مضيعة وقت فيه نقاش بيغير فكرتك أو يصحح معلومة أو يعلمك حاجة لكن لما تلاقي الكلام بيتكرر والهدف بقى إن كل واحد ينتصر لنفسه اسأل نفسك أنا مستني إيه من الحوار ده وهل النتيجة تستاهل الجزء اللي بدفعه من يومي
نصيحة ذهبية بجد
- مش لازم ترد على كل تعليق
- ولا تصحح صورتك في دماغ كل شخص
- ولا يكون آخر رد في النقاش بتاعك
تقدر تكتب فكرتك وتوضحها لو محتاجة توضيح وتكمل حياتك
بعض الناس هتفهمك وبعضهم هيختلف معاك وبعضهم هيصر يشوفك بطريقته
وده مش شيء تقدر تتحكم فيه بالكامل مهما دفعت من وقتك
ال 4 ساعات اللي راحت في محاولة إقناع شخص مش مستعد يسمعك كان ممكن تعيش فيهم حاجة تستحق تفتكرها
وقتك جزء من عمرك اختار بعناية إيه اللي يستاهل تديله جزء منك