فيه ناس بتقضي وقت طويل جدا وهي بتستعد تبدأ حاجة لدرجة إن الاستعداد نفسه بيتحول مع الوقت لحاجة بتمنعها من البداية يعني تلاقي شخص عاوز يتعلم برمجة فيقعد يدور على أفضل لغة برمجة وأفضل محرر أكواد وأفضل كورس وأفضل جهاز وأفضل طريقة للمذاكرة ويقارن بين المصادر ويسأل الناس ويشوف تجاربهم وبعد شهور يكتشف إنه لسه متعلمش يكتب برنامج بسيط
شخص تاني عاوز يبدأ مشروع فيقعد يختار الاسم واللوجو والألوان ويقرأ عن التسويق ويشوف تجارب أصحاب المشاريع لكن لسه مجربش يبيع منتج واحد
المشكلة هنا مش في التحضير بالعكس التحضير مهم جدا لكن المشكلة إنك ممكن تستخدم التحضير كوسيلة للهروب من التجربة الحقيقية من غير ما تحس
ليه بنقع في الفخ ده؟
لأن الاستعداد مريح نفسيا أكتر من التنفيذ يعني طول ما إنت بتستعد إنت لسه معرضتش نفسك لاحتمال الفشل ولسه محدش حكم على مستواك ولسه مش مضطر تواجه حقيقة إنك مبتعرفش تعمل بعض الحاجات لكن أول ما تبدأ فعليا هتكتشف أخطائك ونقاط ضعفك وهتواجه مشاكل مكنتش عامل حسابها علشان كده عقلك أحيانا بيقنعك إنك محتاج معلومة كمان أو كورس كمان أو خطة أفضل مع إن اللي إنت محتاجه فعلا هو إنك تبدأ وتجرب والغريب إنك ممكن تحس إنك بتنجز لأن يومك كله مليان بحث وقراءة وتنظيم لكن لما تبص على النتيجة تكتشف إنك متحركتش خطوة واحدة ناحية الهدف الحقيقي للاسف :(
وهم البداية المثالية
فيه فكرة منتشرة عند ناس كتير وهي إنك لازم تبدأ بداية صحيحة علشان توصل لنهاية صحيحة وده بيخلي الشخص يخاف يبدأ بإمكانيات بسيطة أو معرفة ناقصة أو أدوات مش مثالية لكن الحقيقة إن فيه حاجات كتير مش هتعرف تتعلمها غير لما تبدأ يعني ممكن تقرأ عشرات المقالات عن السباحة لكن ده مش هيخليك تعرف تسبح من غير ما تنزل المياه وممكن تتفرج على مئات الفيديوهات عن البرمجة لكن ده مش معناه إنك هتعرف تحل مشكلة برمجية لما تواجهها بنفسك وممكن تقرأ عن إدارة الوقت طول عمرك لكن لو مش بتطبق أي حاجة من اللي بتقرأها فإنت غالبا بتجمع معلومات عن إدارة الوقت بدل ما تدير وقتك فعلا
هل معنى كده إننا نبدأ من غير تخطيط؟
طبعا لا لأن فيه فرق كبير بين الاستعداد المفيد والاستعداد اللي اتحول لتسويف
الاستعداد المفيد بيقربك من التنفيذ وبيقلل الأخطاء المتوقعة لكن الاستعداد اللي ملوش نهاية بيفتحلك كل يوم باب جديد للبحث والمقارنة والتردد وفيه قرارات فعلا محتاجة دراسة وتجهيز كبير خصوصا لو فيها مخاطرة مالية أو صحية أو مسؤولية تجاه ناس تانية لكن مش كل قرار في حياتك محتاج نفس المستوى من التحضير يعني مش محتاج تدرس سوق العمل كله علشان تبدأ تتعلم أساسيات لغة برمجة ومش محتاج تعرف كل حاجة عن صناعة المحتوى علشان تجرب تعمل أول فيديو ومش محتاج تكون كاتب محترف علشان تكتب أول مقال
التجربة نفسها مصدر للمعلومات
تخيل شخصين عاوزين يتعلموا مهارة معينة
الأول قضى شهر كامل بيبحث عن أفضل طريقة للتعلم
والتاني قضى أسبوع بيبحث وبعدها بدأ يطبق ويغلط ويعدل طريقته
مش بالضرورة الشخص التاني ينجح أسرع في كل الحالات
لكن فيه ميزة مهمة جدا عنده وهي إنه بدأ يجمع معلومات عن نفسه مش بس عن المهارة عرف إيه اللي صعب عليه وإيه اللي محتاج يتعلمه وإيه الطريقة اللي مناسبة ليه وإيه الأخطاء اللي بيكررها ودي معلومات صعب جدا يحصل عليها من تجارب الناس مهما قرأ أو سمع
إمتى تعرف إنك وقعت في فخ الاستعداد؟
اسأل نفسك شوية أسئلة بسيطة
- هل كل يوم بكتشف حاجة جديدة لازم أجهزها قبل ما أبدأ ؟
- هل بقضي وقت في مقارنة الأدوات أكتر من استخدامها ؟
- هل خايف أبدأ علشان النتيجة الأولى متكونش كويسة ؟
- هل عندي معلومات كفاية أعمل بيها خطوة صغيرة لكن لسه مأجلها ؟
- هل بحس بالإنجاز لمجرد إني نظمت الخطة حتى لو منفذتش منها حاجة ؟
لو الإجابات دي بتتكرر معاك فممكن تكون محتاج تغير طريقة تعاملك مع البداية
نصيحة أخيرة
متستناش اللحظة اللي تكون فيها جاهز بنسبة 100% لأن اللحظة دي ممكن متجيش أصلا
ابدأ بالقدر الكافي من المعرفة اللي يخليك تجرب بشكل آمن
وبعدها خلي التجربة تعلمك إنت محتاج تعرف إيه
ومتفتكرش إن كل ساعة قضيتها في التحضير كانت ضايعة
لكن لازم تعرف إمتى التحضير أدى وظيفته وإمتى بقى مجرد تأجيل بشكل منظم
فيه فرق كبير بين إنك تستعد علشان تبدأ وإنك تفضل تستعد علشان متبدأش
وأحيانا أكبر عقبة بينك وبين الحاجة اللي نفسك تعملها مش نقص الإمكانيات ولا قلة المعلومات
لكن اقتناعك إنك لسه مش جاهز ابدأ ياغالي