الحكم

في نجاح محدش هيسقفلك عليه لأنه محدش عارف كان صعب قد إيه زي إنك تمسك أعصابك أو ترجع تحاول بعد خيبة متستناش شاهد على كل خطوة علشان تحس بقيمتها

متوعدش وإنت فرحان بحاجة مش هتقدر تعملها وإنت عادي الحماس بيخليك تشوف طاقتك أكبر من حقيقتها والناس بتفتكر وعدك مش الحالة اللي كنت فيها

لما حد يحكيلك عن وجعه متستعجلش تحكيله إن وجعك أكبر هو مش داخل معاك مسابقة في التعب يمكن كل اللي محتاجه يحس إن فيه حد سامعه

متاخدش نصيحة من حد لمجرد إنه بيتكلم بثقة في ناس صوتها أعلى من خبرتها واللي عارف بجد غالبا عارف كمان حدود معرفته

في حاجات أول ما بتوصل لها بتنسى إنك كنت بتحلم بيها وتبدأ تبص للي بعدها كأن اللي حققته ملوش قيمة ادي نفسك فرصة تفرح مش لازم كل وصول يبقى بداية سباق جديد

مش كل حاجة محتاجة منك رد ولا كل سوء فهم محتاج شرح لو قضيت يومك بتصلح صورتك في دماغ كل واحد مش هتلاقي وقت تعيش سيب مساحة إن بعض الناس تفهمك غلط، وكمل اللي عليك

أصعب خدعة إنك تربط قيمتك باحتياج الناس ليك فتفضل تدي فوق طاقتك وتخاف تقول إنك تعبت لأنك مش متأكد مين هيختارك لو مبقاش محتاج منك حاجة

مش كل طريق تقدر تكمله، يستاهل تكمله أحيانا بنفضل ماشيين علشان نبرر تعب السنين اللي فاتت فنضيع سنين جديدة، دفاعا عن سنين مش هترجع

محاولتك إن كل الناس تفهمك ممكن تخليك تغير نفسك لحد ما إنت شخصيا متبقاش فاهمها

أحيانا بنطلب النصيحة، وإحنا في الحقيقة مستنيين حد يوافق على اللي قررناه

في أسئلة بنفضل نقول إننا مش لاقيين لها إجابة لأننا رافضين أي إجابة غير اللي نفسنا فيها

اللي مستفيد من سكوتك، ممكن يقنعك إن السكوت دايما حكمة

كل ما تتظاهر بالموافقة، الناس بتتعلق بنسخة منك مش إنت

النضج إنك تزعل على اللي كان ممكن يحصل من غير ما تتخلى عن اللي لسه ممكن تعمله

اللي بتهرب من مواجهته هيفضل هو اللي بيحدد طريقك

ممكن تكسب النقاش وتخسر الشخص علشان كدة مش كل انتصار مكسب