الكهنوت المجتمعي ايه هو ؟
هو إن المجتمع يدي لأشخاص أو فئات سلطة معنوية كبيرة لدرجة إن كلامهم يتحول من مجرد رأي قابل للنقاش إلى حقيقة لا يجوز الاعتراض عليها
وتقدر تقرأ عن مغالطة الإحتكام للسلطة عملت عنها فيديو قبل كدة
أمثلة على الكهنوت في المجتمع
- كهنوت المناصب ودة شخص عنده منصب كبير فالناس بتعتبر إن قراراته صح لمجرد منصبه ومحدش يقدر يناقشه
- كهنوت الشهرة ودة شخص مشهور وعنده ملايين المتابعين فتلاقي كلامه بيتاخد باعتباره حقيقة حتى لو بيتكلم خارج تخصصه
- كهنوت العلم ودة شخص حاصل على شهادات علمية كبيرة فيستخدم شهاداته لإسكات أي نقاش بدل ما يقدم الأدلة والحجج
- كهنوت السن ودة شخص كبير في السن فيعتبر إن رأيه لازم يتنفذ لمجرد إنه أكبر وإن مناقشته قلة احترام
- كهنوت العادات والتقاليد ودة ان المجتمع يتعامل مع عادة معينة على إنها قانون مقدس وأي حد يحاول يناقشها يتهاجم حتى لو العادة ملهاش مبرر منطقي
- كهنوت المال ودة ان شخص غني وناجح ماديا فيتحول عند بعض الناس إلى مرجع في كل شيء حتى الأمور اللي معندوش فيها خبرة
إمتى نقدر نقول إن فيه تفكير كهنوتي؟
مش لمجرد إن الناس بتحترم شخص أو بتثق في خبرته لا طبعا
لكن لما تظهر علامات زي مثلا
- الشخص أهم من الفكرة
- المكانة أهم من الدليل
- الطاعة أهم من الاقتناع
- السؤال بيتفسر على إنه تمرد
- النقد بيتفسر على إنه إهانة
- الاختلاف بيتفسر على إنه عداوة
فيه فرق مهم جدا لازم تعرفه
احترام الكبير مش كهنوت
احترام العالم مش كهنوت
احترام صاحب الخبرة مش كهنوت
لكن تحويل الاحترام إلى طاعة عمياء وتحويل المكانة إلى عصمة من الخطأ هو اللي بيخلق التفكير الكهنوتي