يعني ايه Memory ؟
إتكلمنا قبل كدة عن ال Context وعرفنا إنه المعلومات المتاحة لل Model وقت تنفيذ طلبك علشان تساعده يعرف إنت بتتكلم عن إيه
طيب لو بدأت Conversation جديدة إزاي بعض تطبيقات ال AI ممكن تفضل عارفة معلومات عنك أو عن تفضيلاتك من المحادثات القديمة ؟
هنا بقى هنتكلم عن ال Memory "الذاكرة"
ال Memory ببساطة هي طريقة بتستخدمها بعض تطبيقات وأنظمة ال AI للاحتفاظ بمعلومات تخصك علشان تقدر تستخدمها بعدين في محادثات أو مهام مستقبلية يعني بدل ما تبدأ من الصفر كل مرة لا النظام ممكن يحتفظ بمعلومات تساعده يتعامل معاك بشكل أفضل في المستقبل ويعرف طلباتك ويساعدك بشكل كويس
مثال عام
تخيل إنك كل شوية بتطلب من ال AI يكتبلك مقالات وبتقوله "متستخدمش Emojis في المقالات" يعني بدل ما تضطر تكرر المعلومة دي في كل محادثة لو التطبيق بيدعم Memory ممكن يحتفظ بالتفضيل ده ويستخدمه بعد كدة لما يكون مناسب وممكن مثلا تقوله بلاش تشكيل في الكلمات بعد كدة وانت بتتعامل معايا هتلاقي ال Model كاتبلك جملة Memory Updated معناها انه ضاف الطلبات دي للذاكرة وهيتعامل معاك بيها علطول.
مثال خاص بالبرمجة
أثناء كتابة ال Code دايما في عندي طريقة لما بكتب ملف CSS بطلب منه انه يستعمل ال CSS Variables وعلشان مينفعش كل مرة أقوله كدة بنضيف المعلومة دي في ملف ال Memory علشان كل مرة يعمل دة من نفسه ومش محتاج أقولك ان في Memory خاصة بالمشروع وفي Memory ممكن تخليها في البرنامج عامة
طيب إيه الفرق بين ال Context وال Memory ؟
ال Context هو المعلومات المتاحة لل Model أثناء تنفيذ الطلب الحالي
ال Memory هي معلومات بيحتفظ بيها النظام علشان يقدر يستفيد منها في المستقبل سواء داخل المشروع الحالي أو في أي مشروع في المستقبل لو انت ضفت المطلوب في ال Memory العام
مثلا إنت شغال مع ال AI على Project معين وبعتله ملفات و Code وفضلت تتكلم معاه لمدة ساعة تقدر تقول الملفات وال Code والمحادثة والتعليمات المتاحة له دلوقتي ممكن تكون جزء من ال Context لكن لو النظام احتفظ مثلا بمعلومة إنك بتفضل طريقة معينة في كتابة ال Code علشان يستخدمها معاك بعدين دي تقدر تقول عليها ال Memory