يعني ايه AI Model ؟
لما بتفتح ChatGPT أو Claude أو Gemini وتكتب سؤال وتجيلك الإجابة اللي بيحصل ان في الخلفية فيه Model "نموذج" هو اللي بيقوم بالشغل دة اللي انت عملته بغض النظر عن طلبك ايه
ال Model ببساطة هو نظام تم تدريبه على كمية ضخمة من البيانات علشان يتعلم الأنماط والعلاقات الموجودة فيها ويستخدم اللي اتعلمه في التعامل مع مدخلات جديدة علشان يطلعلك المطلوب وبعد التدريب يقدر يتعامل مع المدخلات اللي بتديها له ويولد "Generate" المخرجات اللي انت محتاجها بناء على طلبك.
مثال مثلا لما تكتب لل Model جملة وانت شغال وتقوله مثلا راجعلي على الكلام اللي كتبته دة او ال Code اللي كتبته دة ال Model هنا مش بيفتح كتاب أو قاعدة بيانات فيها إجابات جاهزة ويدور على الإجابة المناسبة ليك لا دة بيعالج الكلام اللي انت كتبته بناء على الأنماط اللي اتعلمها وهو بيتدرب والسياق المتاح ليه وبعدها يولد لك الإجابة المناسبة لسؤالك
طيب أنا بتعامل مثلا مع ChatGPT هل هو ال Model ؟ مش بالظبط ChatGPT هو المنتج أو التطبيق اللي انت بتتعامل بتتعامل معاه أما ال Model فهو المحرك اللي بيشتغل في الخلفية وراء الكواليس وبيولد الإجابات اللي انت بتشوفها.
لو بتشتغل مثلا على برنامج Anti Gravity من Google أو برنامج زي Cursor مثلا دة البرنامج اللي انت بتتعامل معاه وهتلاقي جواه مجموعة من ال Models تقدر تختار منها ال Model المناسب لطلبك وتغير ال Models زي متحب وهتلاقي برامج كتير فيها أشهر ال Models الموجودة على الساحة.
هل ال Models كلها فكرتها واحدة ؟
طبعا لا
في Models متخصصة في مهام معينة
في General-Purpose Models للتعامل مع أنواع كتير من المهام
ال Models بتختلف عن بعض في حاجات كتير زي مثلا :
1- قدرته على تحليل وتنفيذ التعليمات
2- البرمجة
3- السرعة
4- التكلفة والإستهلاك
5- المعرفة والأدوات المتاحة له
ال Model هيعمل إيه لو سألته عن حاجة مش في الحاجات اللي اتدرب عليها؟
تخيل معايا إن في لعبة نزلت من كام يوم وإنت واقف في Level معين فيها ومش عارف تعديه فروحت سألت ال AI تعمل إيه ؟ وهنا لازم نفرق بين ال Model وال Tools المتاحة لل Model تمام ؟ ال Model نفسه مش شرط يكون عنده Access على الإنترنت لكن البرنامج أو ال Agent اللي بتستخدمه ممكن يوفر له Tool للبحث على ال Web علشان يوصل للمطلوب وساعتها يقدر يبحث عن معلومات حديثة عن اللعبة وياخد المعلومات اللي لقاها وبعدها يستخدم قدراته في الإستنتاج التحليل علشان يجاوبك لكن لو مفيش Web Search أو أي مصدر خارجي للمعلومات وال Model مش عنده المعلومات الكافية عن اللعبة مش هيقدر يعرف الأحداث الجديدة من نفسه وفي بعض الحالات ممكن يولد إجابة تبدو صحيحة ومقنعة لكنها في الحقيقة غير صحيحة ودي واحدة من المشاكل المشهورة في ال AI واسمها Hallucination ودي لينا معاها مقال لوحدها بإذن الله