ما الفرق بين IP address و بين Domain ؟

تاريخ النشر26 أكتوبر 2026

تخيل إن عندك رقم تليفون صاحبك وحافظه عندك باسم Ali بدل ما تحفظ الرقم كله

الاسم بيسهل عليك الوصول لصاحبك لكن الاتصال في النهاية بيتم عن طريق الرقم

الفكرة قريبة من الفرق بين ال IP Address وال Domain

ال IP اختصار Internet Protocol ومعناها بروتوكول الإنترنت بروتوكول يعني إتفاقية

ال IP Address هو عنوان بيستخدم علشان نوصل لجهاز على الشبكة زي السيرفر اللي عليه الموقع

مثال على شكل العنوان 192.0.2.10

ال Domain هو اسم النطاق زي elzero.org وده الاسم اللي بتكتبه علشان تفتح الموقع بدل ما تحفظ عنوانه بالأرقام

هنا بييجي دور ال DNS وده اختصار Domain Name System ومعناه نظام أسماء النطاقات

لما تكتب elzero.org المتصفح بيحتاج يعرف عنوان ال IP المرتبط بالاسم ده

وبيستعين بال DNS علشان يوصل له وبعدها يقدر يتصل بالموقع

لو نقلت موقعك لسيرفر جديد ممكن عنوان ال IP يتغير لكن اسم الدومين يفضل زي ما هو

يعني غير موقعك من سيرفر للتاني عادي لكن الدومين هيفضل ثابت وهتحتاج بس تغير توجيه ال IP

ودة بيحصل بانك بتحدث إعدادات ال DNS علشان الاسم يشاور على العنوان الجديد

والزائر يفضل يدخل بنفس اسم الموقع

يعني ال Domain اسم سهل تفتكره

وال IP Address عنوان الاتصال

وال DNS هو اللي بيربط الاسم بالعنوان