ايه المجال اللي يستحق التعب فيه ؟

صيغة سؤالك مش غريبة ولا حاجة وإنك عاوز مجال دخله كويس ده شيء طبيعي جدا بس جملة أنا هحب أي تراك فلوسه كتير دي محتاجة تجرب الأول علشان تتأكد منها انت ممكن تحب نتيجة الشغل اللي هي الفلوس لكن متحبش الشغل نفسه ولا تستحمل مذاكرته ومشاكله اليومية وعلشان كده مينفعش الراتب لوحده يحدد اختيارك لو بتسألني إيه اللي يستحق تتعب فيه قبل الكلية فإجابتي هي أساسيات البرمجة وحل المشكلات والإنجليزي ومعاهم مشاريع صغيرة تعملها بإيدك

الحاجات دي هتفيدك لو كملت Web أو Mobile أو AI أو دخلت في تخصصات تانية ومش هتضطر تبدأ من الصفر كل ما تغير اتجاهك

ابدأ بلغة واحدة اتعلم بيها الأساسيات وطبق على كل حاجة وبعد ما يبقى عندك أساس جرب تعمل موقع بسيط أو برنامج يحل مشكلة عندك وشوف انت مستمتع بإيه وقادر تكمل في إيه لما الموضوع يصعب وخلي التجربة ليها نهاية ومشروع تخلصه علشان متقضيش الفترة كلها بتتنقل بين أول كام فيديو في كل كورس ومع التجربة بص على الوظائف ومتطلباتها في السوق اللي بتستهدفه خصوصا وظائف المبتدئين لأن مرتب شخص عنده عشر سنين خبرة مش هو المرتب اللي هتبدأ بيه

انت عندك 16 سنة ومش مطلوب منك تحسم تخصص عمرك كله دلوقتي استغل الوقت إنك تدخل الكلية وعندك أساس قوي وإنجليزي كويس وكام مشروع وفهم لنفسك خلي هدفك تبقى شاطر في حاجة السوق محتاجها وتقدر تستحمل رحلة تعلمها لأن مفيش اسم تراك لوحده بيضمن شغل أو فلوس كتير