نتعلم ازاي مع سرعة ال AI ؟
لازم نتعلم بشكل مستمر عشان نحقق الهدف الي احنا عايزينو لكن مع سرعة ال AI الواحد بيحس انه بيجري و مش ملاحق كل ما نبدأ نتعلم حاجة و قبل ما نخلصها يظهر حاجة جديدة طيب ايه المنهجية او ال roadmap التي تقترحها حضرتك بحيث نركز على الاساسيات القوية و ما نضيع وراء كل ترند مؤقت
انت مش مطلوب منك تسبق ال AI ولا تتعلم كل حاجة بتنزل انت مطلوب منك تعرف إيه اللي يخدم هدفك وتتعلمه كويس
جزء من إحساس إنك مش لاحق سببه إنك بتقارن اللي انت بتتعلمه بكل الجديد في المجال كله مع إن حاجات كتير من دي ممكن متحتاجهاش أصلا
المنهجية اللي أقترحها عليك بسيطة
1- حدد هدف واضح
بدل ما تقول عاوز أتعلم برمجة قول عاوز أقدر أبني موقع فيه تسجيل دخول وقاعدة بيانات مثلا كده عندك هدف تقدر تحدد على أساسه إيه اللي محتاج تتعلمه
2- خلي عندك مسار أساسي ثابت
أساسيات البرمجة وحل المشكلات وفهم هياكل البيانات وبعدها أساسيات التخصص اللي اخترته لو Web مثلا يبقى تفهم المتصفح وال HTTP وال Databases حسب المرحلة اللي انت فيها وتطبق وانت بتتعلم مش تستنى تخلص كل الأساسيات علشان تبدأ
3- اتعلم بأداة واحدة وخلص بيها
اختار لغة ومصدر أساسي مناسبين للمسار وكمل بيهم لحد ما تعمل مشروع بنفسك ظهور أداة جديدة مش سبب كافي إنك تسيب اللي في إيدك وتبدأ من الأول
4- خلي أغلب وقتك للتعلم والتطبيق وجزء صغير للمتابعة
ممكن تبدأ بتقسيمة 80% للتعلم والمشاريع و20% لمتابعة الجديد وتجربته ولو المتابعة بتشتتك قللها أكتر مش لازم كل خبر يتحول لخطة مذاكرة :)
5- حط فلتر لأي حاجة جديدة
هل بتحل مشكلة عندي دلوقتي ؟
هل مطلوبة لهدفي ؟
هل هتضيف حاجة تستحق وقت تعلمها ؟
لو الإجابة لأ حطها في قائمة لبعدين وكمل اللي بتعمله
6- استخدم ال AI يساعدك تفهم وتختبر نفسك
خليه يشرحلك نقطة ويديك تمرين ويراجع محاولتك ولما يساعدك في الحل اتأكد إنك تقدر تشرح الحل وتعدله وتكتشف غلطه مش مجرد تشغله وخلاص
وراجع خطتك بعد كل مشروع أو كل شهر مثلا وشوف إيه اللي محتاج يتغير بناء على تجربتك مش بناء على آخر بوست شوفته
المقياس الحقيقي لتقدمك هو بقيت تقدر تعمل إيه وتفهم إيه وتحل إيه مش عدد الأدوات اللي عرفت أسماءها ولا عدد الكورسات اللي خلصتها