يعني إيه Algorithm

قبل ما نبدأ

ممكن تكون عارف تكتب كود لكن أول ما تقابلك مشكلة مش عارف تبدأ حلها منين

هنا محتاج ترتب تفكيرك وتحدد الخطوات اللي توصلك للنتيجة قبل ما تختار الأوامر اللي هتكتبها

مش محتاج تثبت برنامج علشان تبدأ القسم ده 

ورقة وقلم كفاية علشان تكتب الخطوات وتجرب تمشي عليها بنفسك

إحنا هنا بنرتب خطوات الحل الأول قبل ما نحولها لكود

معنى الكلمة

ال Algorithm معناها خوارزمية 

وهي مجموعة خطوات واضحة ومرتبة لحل مشكلة أو تنفيذ مهمة 

وبتنتهي بعد عدد محدود من الخطوات

الكلمة مش اختصار ومش اسم لغة برمجة 

ممكن تنفذ نفس الفكرة بأكتر من لغة برمجة

مثال من حياتنا

اعتبر إنك عاوز تعرف إجمالي سعر كتابين قبل ما تشتريهم

هتعرف سعر الكتاب الأول وبعده سعر الكتاب التاني 

وبعدها تجمع السعرين وفي الآخر تعرض الإجمالي

لو الأول سعره 100 والتاني سعره 60 النتيجة هتكون 160

دي خطوات حل بسيطة حتى لو نفذتها على ورقة من غير كمبيوتر

علاقتها بالكود

الخطوات هي فكرة الحل والكود هو طريقة كتابة الخطوات دي بلغة يفهمها الكمبيوتر

لو الخطوات نفسها غلط كتابة الكود بشكل صحيح مش هتخلي النتيجة صح

جرب تفكر

اكتب الخطوات اللي هتعملها علشان تعرف باقي مبلغ 200 بعد شراء كتاب سعره 150

حل التدريب

ابدأ بالمبلغ المتاح وهو 200 واعرف سعر الكتاب وهو 150 

وبعدها اطرح السعر من المبلغ واعرض الباقي وهو 50

يعني بعملية حسابية بسيطة 200 - 150 = 50 وده الباقي

المثال بسيط علشان نركز على الفكرة وهي إننا نحدد المطلوب ونرتب خطوات الحل ونتأكد إن النتيجة صح