الدرس 8
تغيير قيمة ال Variable وتتبعها
الفكرة
ممكن العميل يغير عدد الكراسات وهو بيجهز الطلب
بدل ما يشتري 4 يقرر يشتري 2
هنا اسم المعلومة هيفضل زي ما هو لكن قيمتها هتتغير
القيمة قبل التغيير
قيمة quantity هي 4 وسعر الكراسة price هو 25 والتوصيل delivery هو 15
نغير العدد
نخلي قيمة quantity هي 2 بدل 4 كدة لما نقرأ القيمة الحالية للاسم ده هنلاقيها 2
إحنا استبدلنا القيمة القديمة بالجديدة
نحسب من جديد
نضرب السعر في العدد الجديد 25 × 2 = 50 ونخلي قيمة subtotal هي 50
نضيف التوصيل 50 + 15 = 65 ونخلي قيمة total هي 65
بعدها نعرض الإجمالي الجديد وهو 65
ليه حسبنا الإجمالي تاني
النتيجة اللي احتفظنا بيها قبل كدة كانت مبنية على عدد 4
تغيير العدد لوحده مش بيغير النتيجة القديمة اللي حسبناها
علشان كدة نفذنا خطوات الحساب تاني بالقيمة الجديدة
لمحة من المستقبل
في المثال اللي فات غيرنا العدد وهنا هنبدأ بالسعر 25 والعدد 4 والتوصيل 15
ونجرب تغيير السعر بدل العدد علشان نشوف نفس الفكرة بالكود
ده شكل نفس الخوارزمية لما ننفذها بلغة برمجة ونتعامل مع المتغيرات
في المثال ده هنستخدم لغة Python علشان تشوف إزاي الخطوات اللي حسبناها تتحول لكود
مش مطلوب منك تتعلم اللغة دلوقتي خالص ركز بس على الفكرة
ركز على أسماء المتغيرات والقيم والحساب اللي اتعرفنا عليه
بنفس القيم الموجودة
سعر الكراسة 25 والعدد 4 والتوصيل 15
وال print(total) بتعرض قيمة الإجمالي
price = 25
quantity = 4
delivery = 15
subtotal = price * quantity
total = subtotal + delivery
print(total)النتيجة هي 115 لأن 25 * 4 = 100
وبعد إضافة التوصيل 100 + 15 = 115
لما نغير سعر الكراسة
هنخلي السعر 30 بدل 25 ونسيب العدد والتوصيل زي ما هما وننفذ الحساب من جديد
price = 30
quantity = 4
delivery = 15
subtotal = price * quantity
total = subtotal + delivery
print(total)النتيجة بقت 135 لأن 30 * 4 = 120 وبعد إضافة التوصيل 120 + 15 = 135
غيرنا قيمة price بس ونفس خطوات الحساب اشتغلت بالسعر الجديد
تدريب
العميل غير العدد إلى 3 وسعر الكراسة لسه 25 والتوصيل لسه 15
حدد القيمة الجديدة للكمية واحسب الإجمالي
حل التدريب
نخلي قيمة quantity هي 3
نحسب سعر الكراسات 25 × 3 = 75 ونحتفظ بالنتيجة في subtotal
نضيف التوصيل 75 + 15 = 90 ونحتفظ بالنتيجة في total
نعرض للعميل الإجمالي وهو 90