الدرس 15

إضافة ملفات جديدة و رفعها على GitHub

المرة دي هنضيف ملفات جديدة للمشروع ونكرر خطوات التجهيز والحفظ والرفع علشان نتعود عليها

افتح نفس فولدر learn-git في محرر النصوص واعمل فولدر جديد اسمه docs جنب README.md

ال Docs اختصار Documents ومعناها مستندات

جوه docs اعمل ملف باسم about.txt

ال About معناها عن وهنكتب في الملف تعريف بسيط بالمشروع

اكتب النص ده واحفظ الملف

This Project Helps Me Practice Git

جوه نفس فولدر docs اعمل ملف تاني باسم tasks.txt

ال Tasks معناها مهام واكتب فيه النص ده واحفظه

Practice Adding Files
Practice Making Commits
Practice Pushing To GitHub

افتح Git Bash داخل فولدر المشروع learn-git نفسه مش داخل docs وراجع الحالة

git status

هتلاقي docs/ تحت Untracked files لأن الملفين لسه جداد و Git بيجمعهم تحت اسم الفولدر

ده معناه إن Git شايف الملفات الجديدة لكن لسه مضفناهاش لل Staging Area

ضيف الملف الأول للتجهيز

git add docs/about.txt

وبعده ضيف الملف التاني

git add docs/tasks.txt

ملحوظة

قدام هنتعلم نضيف أكتر من ملف مع بعض

راجع الحالة بعد إضافة الملفين

git status

هتلاقي الملفين تحت Changes to be committed يعني بقوا جاهزين نعمل لهم Commit

هنحفظ الملفين مع بعض في Commit واحد برسالة توضح اللي ضفناه

git commit -m "Add About And Tasks Files"

كدة الملفين اتحفظوا في تاريخ المشروع على جهازك لكن لسه مترفعوش على GitHub

git push

بنستخدم نفس الربط اللي عملناه قبل كدة ومش محتاجين نضيف origin من جديد

افتح نفس مستودع Learn-Git على GitHub واعمل تحديث للصفحة

هتلاقي فولدر docs ظهر جنب الملفات القديمة وافتحه علشان تشوف about.txt و tasks.txt

افتح كل ملف واتأكد إن النص اللي كتبته موجود

هتلاقي رسالة Add About And Tasks Files ظاهرة مع التعديل الجديد

كدة كررنا نفس الخطوات على ملفات جديدة بدل تعديل ملف موجود

آخر تعديل للدرس: 27/10/2026