الدرس 2
الفرق بين Terminal و Shell و Command Line
التلات كلمات دول بتتكرر كتير مع الأوامر
وكل واحدة بتوصف جزء مختلف من اللي إنت بتستخدمه
خلينا نفهمهم بمثال بسيط
معنى الأسماء والمصطلحات
| المعنى | Stand For | Name |
| البرنامج اللي بتكتب من خلاله الأوامر وبتشوف النتائج | Terminal | |
| البرنامج اللي بيفهم الأوامر ويتعامل مع تنفيذها | Shell | |
| واجهة للتعامل عن طريق كتابة الأوامر | Command Line Interface | CLI |
| واجهة رسومية فيها أزرار وقوائم وأيقونات | Graphical User Interface | GUI |
| نوع من البرامج اللي بتفهم الأوامر وتنفذها | Bourne Again SHell | Bash |
ال Terminal هو مكان الكتابة وعرض النتيجة
لما تفتح نافذة تكتب فيها أوامر وتشوف الرد قدامك فالواجهة دي هي ال Terminal
ومن أمثلته برنامج Windows Terminal
تقدر من خلاله تفتح أكتر من Tab
وكل Tab يشغل بيئة أوامر مختلفة حسب البرامج الموجودة عندك
ال Shell بيفهم الأمر
ال Shell هو اللي بيستقبل اللي كتبته ويفهم المطلوب وينفذ الأمر
أو يشغل البرنامج المناسب ليه ومن أمثلته Bash و PowerShell و CMD
علشان كده Windows Terminal و PowerShell مش نفس الحاجة
الأول برنامج لعرض نافذة الأوامر والتاني Shell ممكن يشتغل جواه
ال Command Line هي طريقة التعامل
لما تكتب أمر وتضغط Enter بدل ما تختار المهمة من زرار
فإنت بتتعامل عن طريق سطر الأوامر
يعني إنت بتكتب من خلال ال Terminal وال Shell بيفهم الأمر
ويتعامل مع تنفيذه والنتيجة بتظهرلك في نفس النافذة
مثال يربط الفكرة
افترض إنك فتحت Windows Terminal واخترت PowerShell من قائمة ال Tabs وكتبت الأمر ده
echo "Hello Elzero"هنا Windows Terminal هو البرنامج اللي بتكتب جواه
و PowerShell هو ال Shell اللي استقبل الأمر
وكتابة الأمر نفسها هي استخدام لل Command Line
مكان Git Bash في الموضوع
ال Bash هو ال Shell اللي هنطبق باستخدامه في الكورس
وال Git Bash بييجي مع Git for Windows
وبيوفرلك Bash وأدوات تشتغل بيها على Windows
مش مطلوب تتعلم Git علشان تستخدم Git Bash وتنفذ أمثلة الكورس